इजरेलमा १० जना नेपालीको ज्यान गएको पुष्टि, शव नेपाल ल्याउन ‘पहल गरिँदै’

उसले गाजा क्षेत्र नजिकै रहेका नेपाली नागरिकहरूको उद्धारका लागि आवश्यक समन्वय भइरहेको जनाएको थियो।

 “घाइतेहरूको औषधोपचार, उद्धार र सुरक्षाका लागि नेपाली दूतावासले इजरेली अधिकारीहरूसँग सम्पर्क र समन्वय गरिरहेको छ,” मन्त्रालयले वक्तव्यमा उल्लेख गरेको थियो।

शनिवार बिहानैदेखि इजरेल र प्यालेस्टिनी लडाकु समूह हमासबीच लडाइँ जारी छ। सुरुमा हमासले इजरेलमाथि सयौँ रकेटहरू प्रहार गरेपछि उक्त लडाइँ सुरु भएको हो।

त्यस क्रममा हालसम्म हमासको आक्रमणमा ६०० जना भन्दा बढी मारिएको इजरेलले जनाएको छ। त्यस्तै गाजामा ३७० भन्दा बढीको मृत्यु भएको खबर छ।

इजरेलमा कति नेपाली छन्?

प्रतिनिधिसभाको आइतवारको बैठकमा बोल्दै परराष्ट्रमन्त्री एनपी साउदले इजरेलमा नेपालीहरूको अवस्थाबारे जानकारी दिएका थिएका थिए।

परराष्ट्रमन्त्रीले नेपाल सरकार नेपालीहरूलाई आवश्यक पर्ने सबै सहयोग गर्न र उद्धार गर्नुपर्ने भएमा त्यो पनि गर्ने अवस्थामा रहेको जानकारी सदनलाई गराए।

उनले त्यसका लागि सरकारले एउटा उच्चस्तरीय संयन्त्र बनाइसकेको र आवश्यकता अनुसार त्यसले काम गर्ने बताए।

साउदले भने, “दक्षिणी इजरेलमा रहेका नेपालीको सुरक्षाको प्रत्यभूति गर्न नेपाली दूतावासलाई निर्देशन दिइएको छ र त्यहाँ उद्धार गर्नु परेमा त्यसको व्यवस्था मिलाइनेछ।”

हाल इजरेलमा ४ हजार ५ सय नेपालीहरू केयरगिभरको रूपमा कार्यरत रहेको र २६५ जना विद्यार्थीहरू ‘लर्न एन्ड अर्न’ योजना अन्तर्गत काम गर्दै सिक्नका लागि कृषि क्षेत्रमा रहेको पनि उनले जानकारी दिए।

परराष्ट्रमन्त्रीको सचिवालयद्वारा जारी विज्ञप्तिमा घाइते नेपालको उपचार र उद्धारबारे पनि छलफल भएको उल्लेख छ।

परराष्ट्र मन्त्रालयको आग्रह

यसैबीच आइतवार साँझ परराष्ट्र मन्त्रालयले एउटा सूचना प्रकाशित गर्दै “इजरेलमा उत्पन्न परिस्थिति”का कारण अलपत्र परेका नेपालीहरूका लागि सम्पर्क व्यक्ति तोकेको जनाएको छ।

त्यसमा भनिएको छ, “… विकसित पछिल्लो घटनाक्रमका कारण अलपत्र पर्नुभएका नेपालीहरुलाई आवश्यक जानकारी, सहयोग र सहजीकरण गर्नका लागि देहायबमोजिमका व्यक्तिहरुलाई सम्पर्क व्यक्ति तोकिएको जानकारी गराइन्छ।”