आध्यात्मिक पर्यटनको ठूलो सम्भावना छः प्रदेश प्रमुख

पोखरा । गण्डकी प्रदेश प्रमुख बाबुराम कुँवरले प्रदेशमा आध्यात्मिक पर्यटनको ठूलो सम्भावना रहेको बताउनुभएको छ ।

साउन महिनाको दोस्रो सोमबार आज लमजुङ मध्यनेपाल नगरपालिका वडा नं ६ रामबजारस्थित ईशानेश्वर महादेव मन्दिरको दर्शनपश्चात सञ्चारकर्मीसँग कुरा गर्दै उहाँले धार्मिक क्षेत्रको प्रचारप्रसार गरी पर्यटन प्रवद्र्धनमा जोड दिइनुपर्ने बताउनुभयो ।

प्रदेश प्रमुख कुँवरले गण्डकी प्रदेशमा महत्वपूर्ण शक्तिपीठ रहेको उल्लेख गर्दै यस्ता धार्मिक क्षेत्रको उजागर गर्न स्थानीय र प्रदेश सरकारको महत्वपूर्ण भूमिका रहने बताउनुभयो ।

साउन महिनाको हरेक सोमबार दर्शनार्थीको विशेष भिड लाग्नुका साथै शिवरात्रि पर्वमा सो क्षेत्रमा धार्मिक भेला लाग्ने गरेको इशानेश्वर महादेव क्षेत्र विकास समितिका अध्यक्ष रामचन्द्र घिमिरेले जानकारी दिनुभयो ।