बाढी र पहिरोमा परी देशभर २१ जनाको मृत्यु, १० बेपत्ता (अपडेट)

काठमाडाैँ । बिहिबार साँझदेखि परेकाे अविरल वर्षाका कारण आज (सनिबार) बिहानसम्म देशभर २१ जनाको मृत्यु भएको छ ।  १० जना घाईते भएका छन् भने १० जना बेपत्ता रहेकाे प्रहरीले जनाएकाे छ ।

बेपत्ताको खोजी भइरहेको र ५० जनाको उद्धार गरिएको प्रहरी प्रधान कार्यालयले जनाएको छ । प्रभावित क्षेत्रमा प्रहरी कार्यालयहरुबाट सम्पूर्ण जनशक्ति, श्रोत साधन परिचालन गरिएको प्रहरीले जनाएकाे छ ।

हिजो मिति २०७६-०३-२७ गतेको अविरल वर्षाका कारण देशभर २१ जनाको मृत्यु भएको, १० जना घाईते भएका, १० जना बेपत्ता भएको खोजतलास भइरहेको,५० जनाको उद्धार गरिएको। प्रभावित क्षेत्रमा प्रहरी कार्यालयहरुबाट सम्पुर्ण जनशक्ति,श्रोत साधन परिचालन गरि उद्धार जारी रहेको। ०३-२८ गते ०६:०० बजेको अपडेट

— Nepal Police (@NepalPoliceHQ) July 13, 2019

काठमाडौं उपत्यकामा चार, खोटाङमा तीन, भोजपुर र काभ्रेमा दुई–दुई, इलाम, ओखलढुंगा, पर्सा, झापा, सिन्धुली, रामेछाप, मकवानपुर र धादिङमा एक–एकजनाको मृत्यु भएको प्रहरीका निमित्त प्रवक्ता एसपी रमेश थापाले जानकारी दिनुभयाे ।

देशभर नै वर्षा भइरहेकाले जनधनको क्षति अझै बढ्न सक्ने अनुमान गरिएको छ । मौसम पूर्वानुमान महाशाखाका अनुसार अझै तीन दिन भारी वर्षा हुनेछ । बाढी र पहिरोबाट जोगिन सतर्कता अपनाउन सरकारले आग्रह गरेको छ ।