बजेट अभावले सोचेजस्तो काम गर्न सकिएन : मुख्य मन्त्री गुरुङ

स्याङ्जा । गण्डकी प्रदेशका मुख्यमन्त्री पृथ्वी सुब्बा गुरुङले बजेटको अभाव भएकाले सोचेजस्तो काम गर्न नसकेको बताउनुभएको छ ।

पुतलीबजार नगरपालिकाद्वारा आयोजना गरिएको अन्तर विद्यालयस्तरीय खेलकूद प्रतियोगिताको आज उद्घाटनमा मुख्यमन्त्री गुरुङले प्रदेश सरकारलाई सङ्घीय सरकारले पाँच प्रतिशत मात्र बजेट दिएर खिल्ली उडाएकाले प्रदेश सरकारले सोचेअनुसार काम गर्न नसकेको बताउनुभयो । सङ्घले भन्दा प्रदेशले राम्रा कार्यक्रम ल्याएर विकास निर्माणलाई अगाडि बढाएको बताउँदै उहाँले बजेट कम भए पनि प्रदेश सरकार निराश नभएको बताउनुभयो ।

सङ्घीय सरकारले समन्वयको काम गर्नुपर्ने बताउँदै मुख्यमन्त्री गुरुङले प्रदेश सरकारलाई अप्ठेरो हुने गरी काम नगर्न आग्रह गर्नुभयो । प्रदेशका काममा सङ्घले भाँजो हालेको बताउँदै उहाँले प्रदेश सकरकारको मुख्यमन्त्रीको नाताले विरोध गर्ने बताउनुभयो ।

प्रदेश सरकारको ध्यान प्राविधिक शिक्षमा भएको बताउँदै मुख्यमन्त्री गुरुङले विद्यालयमा गुणस्तरीय शिक्षा प्रदान गर्नका लागि प्रदेशले सहयोग गर्ने बताउनुभयो । उहाँले गण्डकी प्रादेशिक टेक्निकल युनिभर्सिटी खोल्न लागेको जानकारी दिँदै २०१९ को नोभेम्बरसम्म युनिभर्सिटी शुरु हुने बताउनुभयो । मुख्यमन्त्री गुरुङले शिक्षाक्षेत्रमा देखिएको लथालिङ अवस्थाको अन्त्यका लागि आफ्नै पहलमा युनिभर्सिटी खोल्न लागेको जानकारी दिनुभयो ।