प्रधानमन्त्री ओलीको चीन भ्रमण : चिनियाँ राष्ट्रपति सीसँगको भेट सकारात्मक

काठमाडाैं । प्रधानमन्त्री केपी शर्मा ओली सांघाई सहयोग सङ्गठन एससीओको शिखर सम्मेलनमा भाग लिन चीन पुग्नु भएको भए पनि यसलाई कुटनीतिक सम्बन्ध सुधारको अवसरका रुपमा हेरिएको छ ।

चीन पुग्नासाथ चिनियाँ राष्ट्रपति सी जिनपिङले दिएको भेटवार्ता र भारतीय प्रधानमन्त्री नरेन्द्र मोदीसमेत उत्साहपूर्वक सांघाई सम्मेलनस्थलमा पुग्नुलाई महत्वपूर्ण मानिएको छ ।

चिनियाँ राष्ट्रपति सीसँग प्रतिनिधिमण्डलसहितको भेट भएको छ भने एक्ला एक्लै र भारतीय प्रधानमन्त्री मोदीसहितको त्रिपक्षीय भेट हुन बाँकी छ ।

प्रतिनिधिमण्डलसहितको भेटमा प्रधानमन्त्री ओलीले लिपुलेक पास हुँदै द्विपक्षीय सीमा व्यापार गर्न भारत र चीनले गरेको सम्झौताबारे बलियो अडान राखेको परराष्ट्र मन्त्रालयले जनाएको छ ।

प्रधानमन्त्री ओली त्रिदेशीय महत्वको भूभागबारे निर्णय लिइएकोबारे चीनले संवेदनशीलता बुझोस् भन्दा राष्ट्रपति सीले सकारात्मक भाव देखाएको भेटमा सहभागिहरुले बताएका छन् ।

नेपाल, भारत र चीन मामिलाका जानकारहरुले प्रधानमन्त्री ओली औपचारिक समारोह केन्द्रीत मात्र नभई द्विपक्षीय सम्बन्ध तथा त्रिदेशीय सीमा सवालबारे चनाखो भएर प्रस्तुत हुनुपर्ने धारणा राखेका छन् ।

चिनियाँ राष्ट्रपति सीको निमन्त्रणमा प्रधानमन्त्री ओली र भारतीय प्रधानमन्त्री मोदी समयमै जनवादी गणतन्त्र चीनको तियानजिन शहर पुग्नु भएको हो ।०००