शिक्षकहरूलाई जाडो विदामा क्षमता विकासको तालिम लिनु काठमाडौं महानगरको आग्रह

काठमाडौं । काठमाडौं महानगरपालिकाको शिक्षा विभागले सामुदायिक विद्यालयका शिक्षकहरूलाई जाडो विदाको समयमा क्षमता विकास तालिममा सहभागी हुन आग्रह गरेको छ। शिक्षकको सीप अभिवृद्धि गर्दै शैक्षिक गुणस्तर सुधार गर्ने उद्देश्यसहित यो तालिम सञ्चालन गर्न लागिएको हो।

‘टिचर कलेज कार्यक्रम’अन्तर्गत सञ्चालन हुने तालिमले शिक्षकहरूको योग्यतालाई विश्वविद्यालयबाट प्रमाणीकरण गर्ने योजना पनि अघि सारेको छ। सहरी योजना आयोगका सदस्य इञ्जिनियर शैलेन्द्र झाले भने, “सामुदायिक विद्यालयको नतिजा सुधार गर्न शिक्षकको क्षमता विकासमा लगानी गर्नु आवश्यक छ, त्यसैले यो तालिमको आयोजना गरिएको हो।”

तालिमको समय र संरचना

तालिमको समय विद्यार्थीको शैक्षिक क्रियाकलापमा असर नपर्ने गरी जाडो विदामा राखिएको छ। यसले शिक्षकलाई सिर्जनात्मक, एकीकृत, सिपमूलक, र व्यवहारमा आधारित शिक्षण शैलीमा दक्ष बनाउने लक्ष्य राखेको छ। तालिमका विभिन्न चरण यस प्रकार छन्:

पुस २१–२२: कक्षा १० का गणित, विज्ञान, सामाजिक, नेपाली, अंग्रेजी र अर्थशास्त्रका शिक्षकहरूको तालिम।
पुस २३–माघ ७: कक्षा १० का इच्छुक विद्यार्थीहरूको लागि गणित, सामाजिक, विज्ञान, र अर्थशास्त्रलगायत विषयमा एसईई लक्षित सिकाइ कक्षा।

सिकाइका विधि:
प्रविधिको उपयोग
समूहगत सिकाइ
परियोजनामा आधारित कक्षा

पुस २४–माघ ४: पुस्तकरहित शुक्रबार सिर्जनात्मक सिकाइ र सिपमूलक शिक्षाका फोकल शिक्षकहरूको तालिम।
माघ ५–७: शिक्षकका लागि मनोसामाजिक परामर्श र क्यारियर गाइड म्यापिङ तालिम।
पुस २३–२८: प्रारम्भिक बाल विकास शिक्षाका सहजकर्ताको तालिम।
माघ २–७: कक्षा १–३ का शिक्षकहरूका लागि एकीकृत पाठ्यक्रम र निर्माणात्मक मूल्याङ्कनसम्बन्धी तालिम।
पुस २४–माघ ८: रचनात्मक विद्यालय विकास कार्यक्रमअन्तर्गत खेलकुद प्रशिक्षण।
शिक्षा विभागका अनुसार, यी तालिमहरूले शिक्षकको वृत्ति विकास मात्र होइन, विद्यार्थीको शैक्षिक नतिजा सुधार गर्न पनि सहयोग पुर्‍याउनेछ। शिक्षकहरूलाई तालिममा सहभागी हुन समय व्यवस्थापन गर्न आग्रह गरिएको छ।

सामुदायिक विद्यालयहरूको जाडो विदा पुस १८ देखि माघ ८ सम्म रहेको छ। यस अवधिलाई शैक्षिक सत्र २०८१ को कार्ययोजनाअनुसार प्रयोग गरी विद्यार्थीहरूको सिकाइ, खेलकुद, र अन्य गतिविधिमा सकारात्मक प्रभाव पर्ने गरी कार्यक्रमहरू तर्जुमा गरिएको शिक्षा विभागले जनाएको छ।