महिला टी – ट्वान्टी क्रिकेटमा नेपाल सेमिफाइनल प्रवेश

काठमाडाैँ । थाइल्याण्डमा जारी महिला टी – ट्वान्टी क्रिकेटको तेस्रो खेलमा पनि नेपाल विजयी भएको छ । तेस्रो जीत निकाल्ने क्रममा नेपालले यूएईलाई ६ विकेटले पराजित गरेको हो ।

बैंककमा टस जितेर पहिले ब्याटिङ गरेको युएईले दिएको १ सय ६ रनको लक्ष्य नेपालले १९ ओभरमा ४ विकेट गुमाएर पूरा गर्यो । नेपालको जीतमा सीता राना मगर ३७ र काजल श्रेष्ठ २५ रनको योगदान दिए । यूएईका लागि ईशा ओजाले २८, छाया मुगहालले ३१ चमानी सेनेभिराथानेले २३ रन बनाए । नेपालका सिता राना मगर, सोनु खड्का र करूणा भण्डारीले १–१ विकेट लिए । आजको जीतसँगै नेपाल जारी प्रतियोगिताको सेमिफाइनलमा प्रवेश गरेको छ ।

पहिलो खेलमा चीनलाई १० विकेटले हराएको नेपालले दोस्रो खेलमा मलेसियालाई ६ विकेटले पराजित गरेको थियो ।