जेन जीलाई राज्यसंयन्त्रमा सहभागी गराउन ‘छलफल जारी’,

जेन जीलाई अर्थपूर्ण रूपमा सहभागी गराउने भन्ने प्रधानमन्त्रीको प्रतिबद्धतालाई आफूहरूले “सराहनीय” मानेको अभियानकर्मीहरूले बताएका छन्।

विगतका कुनै पनि सरकारले जेन जी पुस्तालाई समेटेर अगाडि बढेको नदेखिएका कारण पनि यो आफूहरूका लागि महत्त्वपूर्ण र सकारात्मक लागेको उनीहरूले बताएका हुन्।

जेनजी आन्दोलनमा सहभागी एक अभियानकर्मी अमृता वन भन्छिन्, “हाम्रो पुस्तालाई चाहिँ यिनीहरू सानै छन्, केही पनि जान्दैनन्, यिनीहरूमा अनुभव छैन भनिन्छ। तर सिंहदरबार कसरी चल्छ भनेर कतै न कतैबाट एउटा अनुभव भयो र थाहा पाउन सक्यौँ भने आउँदा दिनमा नेतृत्व गर्न सक्छौँ। त्यसैले यो संयन्त्रबारे प्रधानमन्त्रीले भन्नुभएको कुरालाई मैले सकारात्मक रूपमा लिएकी छु।”

तर त्यो संयन्त्रमा काठमाण्डूकेन्द्रित जेन जीभन्दा पनि देशभरिका र समावेशी हुने गरी युवाको प्रतिनिधित्व होस् र उनीहरूले दिएका सुझावलाई गम्भीरतापूर्वक लिइयोस् भन्ने आफूलाई लागेको उनले बताइन्।

“संयन्त्र जतिसक्दो सहभागितामूलक होस्। त्यहाँ सुदूरपश्चिमदेखि देशका विभिन्न भागका विभिन्न जातजातिका मानिसहरू समेटिने गरी समावेशी बनोस्। त्यस्तो संयन्त्र केवल बन्नका लागि मात्रै नभई त्यहाँ रहेका युवाले दिएका सुझावहरू सरकारले गम्भीरतापूर्वक लिओस् भन्ने लागेको छ,” उनले भनिन्।