भारतीय प्रधानमन्त्री मोदी र चिनियाँ राष्ट्रपति सी भेटले लिपुलेक मुद्दामा नयाँ सन्देश, नेपालको आग्रह बेवास्ता

काठमाडाैं । भारतीय प्रधानमन्त्री नरेन्द्र मोदी र चिनियाँ राष्ट्रपति सी जिनपिङबीच भएको भेटवार्ताले लिपुलेकपास हुँदै दुई देशबीच सीमा व्यापार सम्झौतालाई थप प्राथमिकता दिने सहमति गरेको छ ।

चीनको तियानजिनमा भएको भेटवार्तामा मोदी र सी यसअघि दुई देशबीच भएका सम्झौतालाई थप तीब्रता दिन सहमत भएको भारतीय विदेश मन्त्रालयले विज्ञप्तिमार्फत जनाएको छ । यहि भदौ ३ गते भारत र चीनका विशेष प्रतिनिधि (एसआर)बीचको वार्तामा नेपाली मूभि लिपुलेकसहित तीनवटा नाकाबाट व्यापार पुनः सञ्चालन गर्ने सहमति भएको थियो । दिल्लीमा भएको उक्त समम्झौतालाई तियानजिन भेटले थप समर्थन गरेको छ ।

नेपाललाई नसोधि गरिएको उक्त सम्झौतालाई प्राथमिकता दिने थप सहमतिसँगै प्रधानमन्त्री केपी शर्मा ओलीले गरेको अनुरोध चिनले नमानेको रुपमा अथ्र्याइएको छ । भातरतीय विदेशमन्त्रालय स्वयंले आधिकारिक वक्तव्यमा दुई पक्षीय भारत–चीन सीमाव्यापार सम्झौताबारे नेपालले राखेको कुरामा चीनले नेपालको पक्ष नलिएको रुपमा व्याख्या गरेको छ भने भारतीय सञ्चारमाध्यमले समेत त्यसैलाई आधार मानेर समाचार सम्प्रेषण गरेका छन् ।

भारतीय विदेश मन्त्रालयको विज्ञप्तिमा यो महिनाको सुरुमा दुई विशेष प्रतिनिधिहरूले गरेको वार्तामा लिएका महत्वपूर्ण निर्णयहरूलाई स्वीकार गरेको र उनीहरूको प्रयासलाई थप समर्थन गर्न सहमत भएको भनी उल्लेख गरिएको छ । तर, चिनियाँ पक्षबाट भने यसबारे आधिकारिक वक्तव्य आइसकेको छैन ।

नेपालको आग्रहमा चीन मौन रहनुलाई कतिपय जानकारहरुले भारतसँग पहिले सहमति गरेर आउनु पर्ने पहिलेकै धारणालाई अघि सारेको रुपमा अथ्र्याएका छन् । केहीले प्रधानमन्त्री ओलीले चीनसमक्ष गरेको आग्रह केवल औपचारिकता मात्रै हुने र भारतीय प्रधानमन्त्री मोदीसँग स्पष्ट कुरा राख्नसक्नु पर्ने रुपमा विश्लेषण गरेका छन् ।००००