आईफोन १६, अरू फोनभन्दा कति फरक छ ? नेपालमा कति मूल्य पर्ला ?

एपलको व्यापारमा सबैभन्दा महत्त्वपूर्ण भूमिका आईफोनको बजारको देखिन्छ। अहिले पनि एपलका उत्पादनमध्ये बिक्रीको आधा भाग आईफोनकै छ। तर केही महिनायता उक्त स्मार्टफोनको बिक्री स्थिर छ।

गत जुन २९ मा अन्त्य भएको नौमहिने अवधिमा अघिल्लो वर्षको सोही अवधिको तुलनामा आईफोनको बिक्री एक प्रतिशतले खस्केको थियो।

एपलले आफ्ना नयाँ फोनहरूमा लामो समय टिक्ने ब्याट्री, शक्तिशाली चिपहरू र गोपनीयतासम्बन्धी विस्तारित सुविधा रहेको जनाएको छ। एपलका अनुसार नयाँ फोनमा एआई र ‘एपल इन्टेलिजन्स’का टुलहरू छन्। तीमध्ये अधिकांश सुविधाको घोषणा गत जुन महिनामा गरिएको थियो।

त्यस्ता नयाँ सुविधामा नयाँ इमोजीहरू बनाउन सकिने र ओपनएआईको च्याटबट ‘च्याटजीपीटी’लाई ‘सिरी’सँग जोड्ने लगायत छन्। सिरीसँग च्याटजीपीटीलाई जोडेपछि प्रयोगकर्ताहरूले सीधै प्रश्न सोध्न सक्छन्।