इजरायल-हमास युद्धमा २१०० भन्दा बढीको मृत्यु, १५० इजरायली हमासको बन्धक

काठमाडाैं । इजरायल र हमास युद्ध: इजरायल र हमासबीच जारी युद्धमा मृत्यु हुनेको संख्या २१ सय नाघेको छ । इजरायल र हमासबीचको यो युद्ध पाँचौं दिनमा पुगेको छ ।

बुधबार पनि आक्रमणले तिब्रता पाएको छ । गाजा पट्टीमा जारी द्वन्द्वका कारण मृत्यु हुनेको संख्या अझै बढी हुन सक्ने अनुमान गरिएको छ । इजरायलका प्रधानमन्त्री बेन्जामिन नेतन्याहुले आतङ्ककारीहरूलाई पूर्ण रूपमा समाप्त गर्न आदेश जारी गरेका छन्।

इजरायली प्रसारक कानले बुधबार हमासको आक्रमणमा करिब १,२०० मानिस मारिएको जानकारी दिएको छ। मृत्यु हुनेमा विदेशी नागरिक पनि रहेको त्यहाँ स्वास्थ्य मन्त्रालयले जनाएको छ । यस द्वन्द्वमा हालसम्म २ हजार ८०६ जना घाइते भएका छन् । संयुक्त राष्ट्र एजेन्सीले पछिल्लो २४ घण्टामा गाजा पट्टीबाट २ लाख ६३ हजार ९३४ विस्थापित भएको जनाएको छ । अब यो संख्या द्रुत गतिमा बढ्ने सम्भावना छ ।