अब मुलुक झन अस्थिर हुने भयो: एमाले अध्यक्ष ओली

काठमाडौं। नेकपा एमालेका अध्यक्ष केपी शर्मा ओलीले अहिलेको निर्वाचनबाट देश झनै अस्थिरतातर्फ जाने दाबी गरेका छन् ।

झापामा आयोजित कार्यक्रममा बोल्दै अध्यक्ष ओलीले अहिलेको निर्वाचन स्थिर सरकार दिने अपेक्षा गरिएको भए पनि त्यसो हुन नसकेको र देश झनै अस्थिरतामा फस्ने देखिएको भन्दै चिन्ता व्यक्त गरे ।

कुनै पनि दलको बहुमत नआउने भन्दै अध्यक्ष ओलीले नयाँ सरकार बन्न कठिन देखिएको बताए । सरकार बनाउन र टिकाउनकै लागि सांसदहरुको मोलतोल सुरु हुने उनले बताए ।

सांसदहरुको मोलतोल गर्दैमा समय सकिने भन्दै अध्यक्ष ओलीले अब बन्ने सरकारले पनि मुलुक र जनताको काम गर्न नसक्ने दाबी गरे । मतदाताले यस निर्वाचनमा कसैलाई पनि बहुमत नदिएको भन्दै अध्यक्ष ओलीले मतदाताकै कारण अब फेरि सरकार गठनमा मोलतोल, भागबण्डाको खेल सुरु हुने ओलीले टिप्पणी गरे ।

निर्वाचनको मत परिणामलाई लक्षित गर्दै ओलीले कतिपय मानिसले राजनीतिलाई रमाइलोको रुपमा लिएको भन्दै त्यसो नगर्न आग्रह गरे ।