कोरोना संक्रमित सांसदले मत कसरी हाल्छन् ?

काठमाडौं । सरकारले कोरोना संक्रमित सांसदका लागि छुट्टै मतदानस्थको व्यवस्था गर्ने तयारी गरेको छ ।

राष्ट्रपति विद्यादेवी भण्डारीले आगामी सोमबारका लागि प्रतिनिधिसभाको विशेष अधिवेश आह्वान गरेकी छिन् । उक्त अधिवेशनमा प्रधानमन्त्री केपी शर्मा ओलीले विश्वासको मत लिने कार्यतालिका छ ।

उक्त प्रयोजनका लागि संक्रमित सांसदले कसरी मतदान गर्न मिल्छ भन्नेबारे शनिबार साँझ बालुवाटारमा बसेको मन्त्रिपरिषद् बैठकमा छलफल भएको छ । छलफलका क्रममा संक्रमित सांसदलाई छुट्टै मतदानस्थल बनाउनेबारे तयारी भएको छ ।

अधिवेशनकै लागि गरिएको सांसदहरुको कोरोना परीक्षणबाट शनिबार साँझसम्म २६ जना सांसदमा संक्रमण पुष्टि भइसकेको छ । ५० जनाको अझै रिपोर्ट आउन बाँकी छ ।