आइफा अवार्ड रोक्न संसदीय समितिको सरकारलाई निर्देशन

काठमाडौेँ  । संघीय संसदको अन्तर्राष्ट्रिय सम्बन्ध समितिले काठमाडौँ महानगरपालिकाको सहआयोजना तथा पर्यटन बोर्डको नेतृत्वमा आयोजना हुन लागेको भारतीय चलचित्रसँग सम्बन्धित निजी क्षेत्रको अवार्ड ‘आइफा अवार्ड’ को कार्यक्रम रोक्न सरकारलाई निर्देशन दिएको छ।

मन्त्रिपरिषद्ले आइफा सञ्चालनका स्वीकृत दिएकोमा महानगर र बोर्डको तर्फबाट रकम खर्च हुने भएपछि त्यसको व्यापक विरोध भइरहेका बेला संसदीय समितिले रोक्न नै निर्देशन दिएको हो।

सिंहदरबारमा मंगलबार बसेको समितिको बैठकले नेपालको सांस्कृतिक स्वत्व र राष्ट्रिय हितमा प्रतिकूल असर पार्ने उद्देश्यबाट उक्त कार्यक्रम प्रेरित भएको भन्दै कार्यक्रम रोक्न सरकारलाई निर्देशन दिएको हो ।

भारतीय निजी कम्पनी बिजक्राप्ट इन्टरनेशनल प्राइभेट लिमिटेडलाई नेपालमा आइफा पुरस्कार कार्यक्रम गर्न दिने सम्बन्धमा नेपाल सरकार र उक्त संस्थासँग गरिने भन्ने सम्झौताको मस्यौदा नेपालको स्वाधिनता, स्वतन्त्रता र अस्मितामा आँच पु¥याउने रहेको समितिले ठहर गरेको छ ।

सम्झौताको मस्यौदामा नेपाल सरकारले व्यहोर्न पर्ने आर्थिक दायित्व अत्यन्तै अनुचित र अस्वभाविक किसिमले ठूलो भई नेपालको आर्थिक अवस्थाको दृष्टिकोणबाट उचित नदेखिएको समितिको निष्कर्ष रहेको छ । बैठकले सरकारसँग कार्यक्रमको समग्र र विस्तृत जानकारी माग गर्ने निर्णय गरेको समितिका सचिव सुरजकुमार दुराले जानकारी दिनुभयाे ।