वातावरण बने निर्वाचनमा जान्छौं : अध्यक्ष ओली

काठमाडौं। नेकपा (एमाले) का अध्यक्ष केपी शर्मा ओलीले चुनावी प्रक्रियामा सहभागी हुन एमाले तयार रहेको तर सरकारले अझैसम्म निर्वाचनका लागि आवश्यक वातावरण बनाउन नसकेको बताउनुभएको छ। उहाँका अनुसार चुनावको वातावरण नबने विघटित प्रतिनिधिसभा पुनःस्थापना हुन सक्छ।

मदन–आश्रित स्मृति प्रतिष्ठानले ११औँ राष्ट्रिय महाधिवेशनको सन्दर्भमा मंगलबार काठमाडौंमा आयोजना गरेको ‘महाधिवेशनका सन्देश र राजनीतिक निकास’ विषयक विचार गोष्ठीमा अध्यक्ष ओलीले यस्तो धारणा राख्नुभएको हो। उहाँले मुलुकको लोकतन्त्र संकटमा पर्दा सर्वोच्च अदालतले समयमै न्याय दिन सक्नुपर्नेमा जोड दिनुभयो। समय बितेपछि आएको फैसलाको अर्थ नहुने उहाँको भनाइ छ।

अध्यक्ष ओलीले लोकतन्त्रमा निर्वाचनको विकल्प नरहे पनि स्वस्थ र भयरहित वातावरण आवश्यक हुने बताउनुभयो। “राजनीतिक नेताहरूलाई लखेटेर निर्वाचन हुन सक्दैन,” उहाँले भन्नुभयो। असंवैधानिक ढंगले प्रतिनिधिसभा विघटन गरिएकाले त्यसको पुनःस्थापना आवश्यक रहेको पनि उहाँको भनाइ थियो।

निर्वाचन नहुँदै प्रधानमन्त्रीको भागबण्डा गरिएको चर्चा निरर्थक भएको उल्लेख गर्दै अध्यक्ष ओलीले निर्वाचनपछि पनि काँग्रेस र एमालेबिनाको सरकार बन्न नसक्ने दाबी गर्नुभयो। मुलुकलाई प्रतिगमनतर्फ लैजाने षड्यन्त्र भए पनि एमाले र काँग्रेसजस्ता शक्तिहरू रहुन्जेल लोकतन्त्र सुरक्षित रहने उहाँले बताउनुभयो। लोकतन्त्र, संविधान, नीति–विधि र राष्ट्रिय स्वाभिमानका विषयमा एमाले र काँग्रेसबीच सहकार्य हुने पनि उहाँको भनाइ थियो।

उहाँले एमालेको सम्पन्न ११औँ महाधिवेशनले नेतृत्वको लोकप्रियता र संगठनात्मक सुदृढताको स्पष्ट प्रमाण दिएको बताउनुभयो। “यो महाधिवेशन अत्यन्तै अर्थपूर्ण र समयानुकूल छ। जनअनुमोदित, विवादरहित र अद्यावधिक नेतृत्व टोली एमालेसँग छ,” उहाँले भन्नुभयो।

नेकपा (एमाले) का उपाध्यक्ष **रामबहादुर थापा ‘बादल’**ले ११औँ महाधिवेशनले एमाले विभाजन गर्न खोज्ने शक्तिलाई पराजित गरेको बताउनुभयो। उहाँका अनुसार एमाले देशकै सबैभन्दा संगठित र व्यवस्थित राजनीतिक दल भएको तथ्य महाधिवेशनले पुष्टि गरेको छ। लोकतन्त्र पुनःस्थापनाको संकल्प पनि महाधिवेशनले गरेको उहाँको भनाइ छ।

एमाले नेता रामेश्वर फुयाँलले देशमा विद्यमान गरिबी, पछौटेपन र शोषण अन्त्य गर्न कम्युनिष्ट आन्दोलनले स्पष्ट दिशा लिनुपर्ने बताउनुभयो। समृद्ध नेपाल र सुखी नेपालीको लक्ष्य पूरा गर्न मदन–आश्रित र बीपी कोइरालाले देखाएको सपना साकार पार्नुपर्ने उहाँको भनाइ थियो। एमाले र काँग्रेसजस्ता शक्तिको सहकार्यबाट मात्र मुलुक समृद्ध बन्न सक्ने उहाँले उल्लेख गर्नुभयो।

कार्यक्रम मदन–आश्रित स्मृति प्रतिष्ठानका अध्यक्ष प्रदीपकुमार ज्ञवालीको अध्यक्षतामा सम्पन्न भएको थियो। कार्यक्रममा नेपाली काँग्रेसका नेता मिनबहादुर विश्वकर्मा र काठमाडौं महानगरपालिकाका उपप्रमुख सुनिता डंगोललगायतले सम्बोधन गर्नुभएको थियो।