महामारीका बेला बच्चा जन्माउन प्रोत्साहित गर्न पैसा दिइने

बीबीसी । कोरोनाभाइरस महामारी फैलिएको भए पनि मानिसहरूलाई बच्चा जन्मानउ प्रोत्साहित गर्न सिङ्गापुर सरकारले एक पटकका लागि भत्ता दिने प्रस्ताव गरेको छ।

आर्थिक सङ्घर्ष गर्नुपर्ने र जागिर गुमाउने नागरिकहरूले सन्तान पाउने योजना स्थगित गरिरहेकोमा सरकारलाई चिन्तित बनाएको बीबीसीले समाचारमा जनाएकाे छ ।

महामारीमा बच्चा जन्माउन चाहने अभिभावकलाई कति रकम उपलब्ध गराइनेछ भन्नेबारे विस्तृत विवरण चाहिँ सार्वजनिक भएको छैन।

बच्चा जन्माउन प्रोत्साहनस्वरूप सिङ्गापुर सरकारद्वारा दिँदै आइएको बोनसबाहेक अतिरिक्त रकम दिन लागिएको हो।

सिङ्गापुरमा संसारकै कममध्ये जन्मदर छ जसलाई बढाउन दशकौँदेखि सरकार सङ्घर्षरत छ।

कोरोनाभाइरस महामारीलाई लिएर गरिएको लकडाउनका बेला फिलिपिन्स र इन्डोनेशियाजस्ता छिमेकी देशमा गर्भवती हुनेहरूको सङ्ख्यामा व्यापक वृद्धि हुनसक्ने बताइँदै गर्दा सिङ्गापुरमा त्यसको विपरीत अवस्था देखिएको छ।

किन भत्ता ?

“कोभिड-१९ का कारण बच्चा पाउन चाहने कतिपय अभिभावकले त्यो योजनालाई स्थगित गर्न चाहेको हामीले प्रतिक्रिया पाएका छौँ,” सिङ्गापुरका उपप्रधानमन्त्री हेङ स्वी कीटले सोमवार भने।

महामारीका बेला बच्चा पाउन चाहने अभिभावकलाई कति र कसरी रकम उपलब्ध गराउने विषयमा पछि जानकारी गराइने उनले बताए।

सिङ्गापुर सरकारले हाल ‘बेबी बोनस सिस्टम’ अन्तर्गत योग्य अभिभावकलाई १०,००० अमेरिकी डलरसम्म उपलब्ध गराउँदै आएको छ।

सन् २०१८ मा सिङ्गापुरमा प्रजननदर आठ वर्षयताकै सबैभन्दा कम अर्थात् प्रतिमहिला १.१४ थियो।

धेरै एशियाली मुलुकले प्रजननदरमा यस्तै समस्याको सामना गर्दै आएका छन् र कोरोनाभाइरस महामारीका बेला यो समस्या झन् दयनीय हुन सक्ने बताइन्छ।

यसै वर्षको आरम्भतिर चीनमा प्रजननदर ७० वर्षअघि चिनियाँ जनगणतन्त्र स्थापना भएयताकै सबैभन्दा न्यून बिन्दुमा झरेको थियो।

निकै आलोचित ‘एक सन्तान’ नीतिमा खुकुलोपन ल्याइए पनि त्यस्तो समस्या देखिएको हो।

विपरीत अवस्था

तर सिङ्गापुरका केही छिमेकी देशमा उल्टो खालको समस्या देखिएको छ।

संयुक्त राष्ट्रसङ्घीय जनसङ्ख्या कोषका अनुसार फिलिपिन्समा यदि महामारी नियन्त्रणका लागि हिँडडुलमा प्रतिबन्धहरू यो वर्षको अन्त्यसम्म कायम रहे पाँच लाखदेखि २५ लाखसम्म अनिच्छित गर्भ रहनेछ।

“यो सङ्ख्या आफैँमा एउटा महामारी हो,” फिलिपिन्सस्थित राष्ट्रसङ्घीय निकायका प्रवक्ता ऐमी सान्तोसले गत महिना भनेका थिए।

दक्षिणपूर्वी एशियाली मुलुकमध्ये फिलिपिन्सको जनसङ्ख्या दोस्रो ठूलो अर्थात्‌ १० करोड ८४ लाख छ।

फिलिपिन्स यो क्षेत्रकै कोरोनाभाइरसबाट सबैभन्दा नराम्ररी प्रभावित हुने मुलुकमा पर्छ।

त्यहाँ हालसम्म ३,०७,००० जना व्यक्ति कोरोनाभाइरसबाट सङ्क्रमित भएका छन्।