स्याङ्जाकी सुनिताले पोखरामा जन्माइन् एकै पटक ४ सन्तान

कास्की । पोखराको मनिपाल शिक्षण अस्पतालमा बिहीबार चम्ल्याहा शिशुको जन्म भएको छ । स्याङ्जाको पुतलीबजार नगरपालिका–१ की २६ वर्षीया सुनीता पौडेल प्रधानले ३ छोरी र १ छोरालाई जन्माएकी हुन् । अस्पतालका अनुसार चारैजना शिशु र आमाको स्वास्थ्य ठीक छ ।

गत आइतबार उनी प्रसूतिका लागि मनिपाल भर्ना भएकी पौडेलको डा. महेन्द्र पाण्डेको नेतृत्वमा शल्यक्रियामार्फत चार बच्चाको जन्म दिइएको हो । डा. पाण्डेका अनुसार पहिलो बच्चा छोरी डेढ केजीकीलाई ९ बजेर ४९ मिनेटमा निकालिएको थियो । त्यसपछि दोस्रो बच्चा छोरा (१.३ केजी), तेस्रो र चौथो बच्चा छोरीहरु (१.३ र १.४ केजीका) लाई ९ बजेर ५० मिनेटमा निकालिएको हो ।

पाण्डे नेतृत्वमा ७ चिकित्सक र स्वास्थ्यकर्मीको पहलमा करिब ४० मिनेट लगाएर शल्यक्रियामार्फत बच्चाको जन्म गराइएको हो । सुनीताको यो दोस्रो गर्भ भएको बताइएको छ । उनको ५ वर्षीय एक छोरा छन् ।