आजबाट नयाँ नोट, कहाँ–कहाँ र कति पाइन्छ साट्न ?

काठमाडौं । नेपाल राष्ट्र बैंकले सर्वसाधारणका लागि आज(आइतबार)देखि नयाँ नोट बितरण गर्ने भएको छ ।नेपालीहरुको महान चाड दशैंलाई लक्षित गर्दै राष्ट्र बैंकले आजबाट नयाँ नोट सटहीको सुविधा दिन लागेको हो । याे सुबिधा असाेज २९ गतेसम्म उपलब्ध हुनेछ ।

नयाँ नोट ५, १०, २०, ५० रुपैयाँ दरका नयाँ २–२ बन्डल र १ सय रुपैयाँ दरका एक बन्डल गरी अधिकतम जम्मा २७ हजार रुपैयाँसम्म प्रतिव्यक्ति सटही सुविधा दिने राष्ट्र बैंकले जनाएको छ ।

नयाँ नोट राष्ट्र बैंकको केन्द्रीय, क्षेत्रीय कार्यालय तथा केही वाणिज्य बैंकहरुबाट सटही गर्न सकिनेछ । यस वर्ष राष्ट्र बैंकका कार्यालयबाहेक नेपाल बैंकका न्युरोड, पाटन औद्योगिक क्षेत्र, कीर्तिपुर, महाराजगन्ज, जोरपाटी, लाजिम्पाट र भक्तपुर कार्यालयबाट नयाँ नोट वितरण गरिने छ । यसैगरी, राष्ट्रिय वाणिज्य बैंकका सिंहदरबार प्लाजा, टेकु, नयाँ बानेश्वर, सानोठिमी, विशाल बजार, नक्साल, कंलकी र बालाजु शाखाबाट पनि नयाँ नोट साट्न सकिने छ । साथै कृषि विकास बैंकका गौशाला, कोटेश्वर, रामशाहपथ, रत्नपार्क, स्वयम्भु र मंगलबजार शाखाबाट नयाँ नोट साट्ने व्यवस्था मिलाइएको छ । ती ठाउँबाट पनि अधिकतम प्रतिव्यक्ति २७ हजार रुपैयाँसम्म साट्न सकिने व्यवस्था गरिएको छ।

उपत्यका बाहिरको हकमा राष्ट्र बैंकका क्षेत्रीय कार्यालयसहित नोट कोष रहेका वाणिज्य बैंकका शाखाबाट समेत सटही सुविधा उपलब्ध हुने राष्ट्र बैङ्कले जनाएकाे छ ।

नयाँ नोटमा केरमेट गरे तथा काम नलाग्ने गरी जथाभावी प्रयोग गर्नु गैर कानूनी भएको र त्यसो गरे ३ महिनासम्म जेल सजाय समेत हुनसक्ने भन्दै सचेत रहन राष्ट्र बैंकले सबैमा अनुरोध गरेको छ ।