अप्रत्यासित रुपमा बढ्यो सुनको मूल्य, तोलाको कति ?

काठमाडौँ । स्थानीय बजारमा नम्बरी सुनको मूल्य बिहीबार पनि अप्रत्यासित रुपमा बढेर नयाँ रेकर्ड कायम भएको छ ।

बुधबार प्रतितोला एक लाख एक हजार ४ सय रुपैयाँमा कारोबार भएको छापावाला सुनको मूल्य बिहीबार पनि बढेर १ लाख २ हजार ५ सय पुगेको छ । यो साविक दिनको तुलनामा १ हजार एक सय रुपैयाँले बढी हो ।

नेपाल सुन चाँदी व्यवसायी महासंघका अनुसार यो मूल्य नेपाली बजारमा इतिहास कै उच्च मूल्य हो । तेजाबी सुनको मूल्य बिहीबारका लागि एक लाख दुई हजार २०० निर्धारण गरिएको छ ।

नेपाल सुनचाँदी व्यवसायी महासंघका अनुसार बुधबारको तुलनामा बिहीबार चाँदीको मूल्य ५० रुपैयाँले बढेको छ । प्रतितोलला चाँदीको मूल्य बिहीबार एक हजार ३ सय ४५ निर्धारण गरिएको छ ।

कोरोनाको संक्रमण रोक्न लकडाउन लागू गरिएयता जेठ २५ गते एक तोला सुनको मूल्य १० हजार ४०० ले बढेर ८७ हजार पुगेको थियो । त्यसयता सुनको मूल्य निरन्तर उकालो लागिरहेको छ । ०००