कालीमाटीको तरकारी बजार बन्द, काठमाडौँका यी ११ ठाउँबाट हुँदैछ ताजा तरकारी बिक्री

काठमाडौँ । कालीमाटीस्थित देशकै ठूलो तरकारी तथा फलफूल बजार आजदेखि बन्द गरिएको छ । काठमाडौँ महानगरपालिकाले कालीमाटीमा तरकारी किन्ने उपभोक्ता र व्यापारीको भीड नियन्त्रण गर्न कारोबार बन्द गरेको हो ।

बजारमा तरकारी भित्रिए पनि कारोबार भने महानगरले तोकेका बजारबाट मात्रै गरिने बताइएको छ । कालीमाटी बन्द भएसँगै आज बिहानदेखि कलंकीबाट तरकारी तथा फलफूल बिक्री सुरु भएको छ ।

महानगरपालिकाले लकडाउन अवधिभर र कोरोना भाइरस नियन्त्रण नहुँदा सम्मका लागि विभिन्न ११ स्थानमा अस्थायी बजार स्थापना गरी बिक्री वितरणको प्रबन्ध मिलाउन कालीमाटी समिति र थोक व्यापारीलाई आग्रह गरेको थियो ।

काठमाडौँको खुलामञ्च, तीनकुने, गौशाला, चक्रपथ, महाराजगञ्ज, बालाजु, बल्खु लगायतका ११ स्थानमा तरकारी बिक्रीको प्रबन्ध मिलाइएको महानगरपालिकाका प्रवक्ता ईश्वरमान डङ्गोलले जानकारी दिनुभयो ।

कालीमाटी फलफूल तथा तरकारी बजार विकास समितिका कार्यकारी निर्देशक तेजेन्द्रप्रसाद पौडेलले लकडाउनको बेला भीड बढेर कोरोनाको जोखिम हुने खतरा देखिएपछि कालीमाटीबाट तरकारीको कारोबार बन्द गरिएको जानकारी दिनुभयो । ०००

Leave a Reply

Your email address will not be published. Required fields are marked *