के सहकारी प्रकरणमा गृहमन्त्रीमाथि प्रहरीले अनुसन्धान नगरेको हो?

यसअघि संसद्को राज्य व्यवस्था तथा सुशासन समितिमा सांसदहरूलाई जबाफ दिने क्रममा नेपाल प्रहरीका महानिरीक्षक वसन्तबहादुर कुँवरले आफूहरूसँग भएको तथ्य प्रमाणले लामिछानेको संलग्नता नदेखिएको बताएका थिए।

बुधवार बीबीसी न्यूज नेपालीसँग कुरा गर्दै प्रहरी प्रवक्ता भीमप्रसाद ढकालले गृहमन्त्री भएकै कारण लामिछानेलाई प्रहरीले अनुसन्धानबाट बाहिर नराख्ने दाबी गरे।

“जति पनि मुद्दाहरू आएका छन् त्यसबारे हाम्रा अनुसन्धानकर्मीहरूले राम्रोसँग अनुसन्धान गरिरहेका छन्। कानुनले प्रहरीलाई अनुसन्धानको अधिकार दिएको छ र यो मात्रै नभएर सबै मुद्दामा अनुसन्धान गरिरहेको छ,” सहकारी ठगीबारे प्रहरीले अनुसन्धान गरिरहेको दाबी गर्दै उनले भने।

उनले सहकारी ठगीसम्बन्धी कतिपय उजुरीहरूमा अनुसन्धान सकिएर अभियोजनकर्तालाई बुझाइएको र अन्य कतिपयमा अनुसन्धान भइरहेको बताए।