‘बेसार पानी’पछि प्रधानमन्त्रीकाे ‘हेल्थ टिप्स’: गर्मीमा कोल्ड ड्रिङ्क्स होइन मोही खानुस्

काठमाडौं । पाेहर साल काेराेना भाइरसबाट बच्न बेसार पानी खान सुझाएका प्रधानमन्त्री केपी शर्मा ओलीले यसपाली फेरि अर्काे हेल्थ टिप्स सुनाएका छन् । बेसार पानी खाए राेगप्रतिरक्षा प्रणाली बलियाे हुने र काेराेना भाइरसकाे संक्रमणाबाट पनि बचिने भनेपछि निकै ट्राेल बनेका ओलीले गर्मीमा माेही खान भनेका छन् ।

प्रधानमन्त्री ओलीले बजारमा पाइने इनर्जी ड्रिङ्स स्वास्थ्यका हितकारी नभएको बताउँदै गाई भैंसीको मोही पिउन सुझाव दिएका हुन् । बिहिबार ललितपुरमा कृषि मन्त्रालयले आयोजना गरेको पशुपंछी जन्य उत्पादनमा मुलुक आत्मनिर्भर घोषणा कार्यक्रममा बोल्दै प्रधानमन्त्री ओलीले मोही खान सुझाव दिएका हुन् ।

यो गर्मीमा के के ड्रिङ्स, मोही पो खानुपर्छ त । मोही पो खानुपर्छ । विदेशबाट बट्टामा इनर्जी ड्रिङ्स भनेर बिग्रिएको पानी पो आएको हुन्छ कि, केही थाहा हुँदैन । मोही दुई तीन दिनभित्र खाइ सक्नुपर्छ । फ्रिजमा राख्यो भने दुई चार दिनसम्म पनि लम्ब्याउन सकिन्छ । खाने मोही हो नि, मोहीमा जस्तो तागत के मा छ ?’ प्रधानमन्त्रीले भने ।

प्रधानमन्त्री ओलीले डेरी उत्पादन जतिको स्वाथ्यवर्दक अरु पेय पदार्थ हुन नसक्ने बताए । यस्तै प्रधानमन्त्रीले विभिन्न ब्राण्डमा नेपालमा चकलेट उत्पादन गर्न सकिने बताएका छन् । उनले त्यस्ता चकलेटका सम्भावित ब्राण्डहरु समेत सिफारिस गरेका छन् । उनले भने– ‘उनले हामीले स्वीट्जरल्याण्ड, हल्याण्डको चकलेट किन खानुपर्यो ? हिमालय चकलेट किन नबनाउने ? माउन्ट एभरेष्ट चकलेट किन नबनाउने, माछापुच्छ्रे चकलेट किन नबनाउने ? फेवा चकलेट किन बनाउन नसक्ने ? फोक्सुन्डो चकलेट ।’ हामीले उत्पादन गरेका दूधबाट यस्ता धेरै ब्राण्ड दिएर चकलेट बनाउन सकिने उनले सुझाए ।

उनले चौरीको दुधबाट बनेका खाद्यवस्तुलाई ब्राण्डिङ गरेर अलि बढी मूल्यमै पनि बिक्री गर्न सकिने बताए । उनले चौरीको दूधबाट बनेका खाद्यवस्तु र च्याङ्‍ग्राको मासुलाई जडिबुटी खाएर उत्पादन भएको भनेर बढी मूल्यमा बेच्न सकिने उल्लेख गरे । उनले ती वस्तुमा औषधीय गुण छ, त्यसकारण यसको मूल्य बढी पर्छ भनेर बिक्री गर्ने हो भने महङ्गो भएर पनि ग्राहक फेरि खरिद गर्न आउने बताउँदै ठूलो स्केलमा उत्पादन गर्नुपर्ने बताए ।

यस्तै औषधीय गुण भएका फलफूल उत्पादन गरेर पनि बिक्री गर्नुपर्ने बताउँदै उनले एकपटक जामुन खाए एक वर्षलाई कलेजो सफा हुने उल्लेख गरे । उनले सरकारले कृषि क्षेत्रमा बैदेशिक लगानी खुला गर्न लागेको बिषयमा आफ्नो बचाउ गर्दै नेपालमा उत्पादन भएको कृषिजन्य सामग्री उत्पादन भई विदेशमा निर्यात गर्न सक्ने दावी गरे ।