सय किलो भनिएको सुन निकालेर जाेख्दा लगभग ६१ किलो, अझै घट्न सक्ने !

काठमाडाैं । मोटरसाइकलको ‘ब्रेक शु’भित्र लुकाएर ल्याइएको सुनको मात्रा ६० किलो सात सय ८९ ग्राम फेला परेको छ ।

ब्रेक शुबाट निकालेर जोख्दा ६० किलो सात सय ८९ ग्राम तौल रहेको र त्यसमा केही कालो पदार्थसमेत मिसिएकाले यो प्रारम्भिक तौल मात्रै भएको नेपाल राष्ट्र बैंक, टक्सार महाशाखाका प्रमुख थानेश्वर आचार्यले राससलाई बताउनुभयो ।

उहाँका अनुसार भोलि बिहान १०ः३० बजेदेखि भने गाल्ने काम सुरु हुनेछ । त्यसपछि आर्थिक परीक्षणको काम थालिने पनि उहाँले बताउनुभयो ।

महाशाखा प्रमुख आचार्यले एक दिन सुन गाल्न लाग्ने र त्यसपछि आर्थिक परीक्षणको काम कम्तीमा तीन दिन लाग्ने बताउनुभयो । उहाँले सबै सरोकारवाला प्रतिनिधिहरूको रोहवरमा गाल्ने प्रक्रिया सुरु भएको बताउनुभयो ।

राजस्व अनुसन्धान विभागले यही साउन ३ गते सिनामङ्गलस्थित भन्सार कार्यालय अगाडिबाट सुनसहितको एक सय ५५ किलो ‘ब्रेक शु’ बरामद गरेको थियो । त्यसपछि उक्त सुनसहितको ‘ब्रेक शु’ टक्सार महाशाखामा राखिएको थियो ।

उन्नाइस दिनपछि प्रधानमन्त्री पुष्पकमल दाहाल ‘प्रचण्ड’को निर्देशनमा सुन प्रकरणको अनुसन्धानको काम राजस्व अनुसन्धान विभागले प्रहरीको केन्द्रीय अनुसन्धान ब्यूरो (सिआइबी)लाई दिइएको थियो । सिआइबीको पत्रपछि आजदेखि सुन गाल्नेलगायतका प्रक्रिया थालिएको हो ।

हङकङबाट ल्याइएको सुनको वास्तविक मालिक को हो भन्ने अझै खुलेको छैन। यो प्रकरणमा १८ जना पक्राउ परे पनि धेरैजसो सुन ओसारपसारमा संलग्न मात्रै छन्।

तिब्बती मूलका बेल्जियमका नागरिक दावा छिरिङले भने चिनियाँ पक्षसँग मिलेर नेपालमा अवैध सुनको व्यवस्थापन गरेको खुलेको छ। उनी हालसम्म पक्राउ परेका उपल्ला तहका सदस्य रहेको प्रहरीको दाबी छ।

शुरूमा प्रहरीलाई समानान्तर रूपमा संलग्न नगराएकाले प्रमाण सुरक्षणका कारण तस्करको माथिल्लो तहसम्म अनुसन्धान पुग्न भने कठिन हुनेछ। चौतर्फी दबाबपछि मात्र प्रधानमन्त्री पुष्पकमल दाहालले अनुसन्धानको जिम्मा सीआईबीलाई दिन निर्देशन दिएका थिए।