काठमाडौं । नेपाली कांग्रेसको नियमित महाधिवेशन पक्षधर तथा शेरबहादुर देउवा नेतृत्वको ’नेपाली जनसम्पर्क समिति क्यानडा’को सभापतिमा टोष्टराज कार्की (बसन्त) कार्की निर्वाचित भएका छन् ।
टोरन्टोमा भएको नेपाली जनसम्पर्क समिति क्यानडाको चौथो अधिवेशनबाट कार्की जनसम्पर्क समितिको सभापति निर्वाचित भएका हुन् । यसअघि जनसम्पर्क समिति क्यानडाको महामन्त्री रहेका कार्कीलाई १५औं केन्द्रीय महाधिवेशन तयारी समितिका संयोजक प्राध्यापक डाक्टर शशांक कोइरालाले संयोजकको जिम्मेवारी तोकेका थिए ।
अधिवेशनअघि कार्तिक १२ गते संयोजक तोकिएका वीरेन्द्र राउतलाई हटाएर कार्की नै संयोजक तोकिएका हुन् । पार्टीको १५औँ केन्द्रीय महाधिवेशन मंसिर २१, २२ र २३ गते काठमाडौंमा हुने कार्यतालिका छ ।
नेपाली जनसम्पर्क समिति क्यानाडाको सभापति निर्वाचित कार्की परिवारले प्रजातान्त्रिक आन्दोलनमा पुस्तौँदेखि निष्ठा र समर्पण कायम राखेको छ । कार्कीको परिवार लामो समयदेखि नेपाली कांग्रेसको विचार, सिद्धान्त र आदर्शप्रति प्रतिवद्ध रहँदै आएको बताइएको छ ।
कार्की परिवारबाट मात्रै १२ देखि १५ जना सदस्य कांग्रेसप्रति आस्थावान् तथा क्रियाशील छन् । उनीहरूले पार्टीको वर्तमान आधिकारिक नेतृत्वको पक्षमा एकवद्ध हुँदै संगठन सुदृढीकरणका गतिविधिमा थप सक्रिय रहने प्रतिबद्धता पनि व्यक्त गरेका छन् ।

